كلنا مصريين

موضوع: كلنا مصريين الإثنين يناير 14, 2013 3:11 am

خرجت علينا جماعات

اللي سلفي واللي اخوان

واللي عايشين

في زمن غير الزمان

عايزه تفرض رأيها

جايه تمثل نفسها

تحل مشاكلنا كمان

من عداله

من اجور

من طعام نسيناه من زمان

من مطالب ثورة قامت في الميدان

بس يا خساره للأسف

خرجت علينا تنادي بالأنفصال

نعزل حريمنا ف الوظايف

عن الرجال

نسيوا ان مصر 65 % من شعبها

اللي شاغلين الوظايف م الحريم

وان مصر طول عمرها

شعبها شعب كريم

مؤمن بربه من ملايين السنين

لما اخناتون نادى من قبل الزمان

ان في الكون اله واحد

ورب عظيم

هوه حامي الكون وهوه الوحيد

حسسونا ان مصر عايشه الكفر

وجايين يهدوا اهلها

واللي سايب مصايبنا وجاي يدور

ع الآثار

نغطيها بشمع احمر ونداري الوشوش

او نزيلها م الوجود زي هبل

اصحوا يا صحاب الكروش

نسيوا انها تاريخ بلد

وحضاره من قبل الميلاد

فيها ريحه من عرق مصري اتولد

قبل الميلاد

فيها علم وابتكار

فيها اتعلم العالم دروس

ولسه بيتعلم كمان

فيها سر الكون والخلود

واسرار الزمان

تقولش يا واد هما بس اللي عرفوا ربهم

واحنا اللي عايشين الضلال

مليون سؤال بسأله

ليه لما عمرو فتح مصر

من اكثر من الف عام

ليه ما هدمها وزال

ليه ما خلعها من جذورها زي ضرس

طول الليل بيوجعني وما خلاني انام

ليه سمح ليها بالحياة وهما جايين

يدوروا النهارده عن الحلال والحرام

قال وايه المسيحي بينا ملوش مكان

يطفش يهاجر او يغادر

او يروح في ستين الف داهيه مش مهم

اصلهم مش م البلد دي

ولا تابعين للتتار

مصر يا اخوانا اصلها قبطي وموحدين

عاش فيها المقوقس وعاش فيها اسماعيل

عاش فيها موسى وعيسى ويوسف

وكل الصديقين

ارحمونا ودوروا عل المفيد

مصر عايزه امن وامان

وايد من حديد

مصر عايزه عدل وحياه كريمه من جديد

مصر عايز شعبها يقدر يعيش

مش يكمل لقمته من زباله

ولا يعيشوا عيشة عبيد

مصر طول عمرها بتضمنا

مسلم مسيحي يهودي

ولا حتى

من ملة منعرفش اصلها

دول كلهم كانوا مننا

مين اللي قال انك السلفي الوحيد

كل المسلمين اصلهم سلفي اكيد

مؤمنين وموحدين بالآله

رب كل الخلق

من آدم حتى اخر طفل وليد

مؤمنين بالانبياء والرسل

من نوح

حتى محمد نبينا الهادي الامين

يا عم خليك م السياسه

وروح دور علي صحرا فيها تعيش

العالم بيطلع للأمام

وانتا عايز ترجعنا سنين

ارحمونا من كلامكم

من خطابكم

من كل فكر عقيم

واقتدوا برسولنا الكريم

خلوا اسلامنا سماحه

مش وقاحه

مش فكر بليد

مصر هتبني نفسها

من فكرها

من ارض خصبه ارتوت

بدم الشهيد

بكره نزرعها امل

ونحصد زرعها حب وعمل

ونعيش فيها كلنا

تحت رايه تضمنا

اسمها حب الوطن

مش مهم الاسم ايه

ولا من اي دين

المهم اننا هنا كلنا

مصريين